Fillos de Minerva

Como cada ano por estas datas ve luz o volume compilatorio que recolle os textos en prosa e verso gañadores dos Premios Literarios Minerva que organiza o prestixioso Colexio Peleteiro de Santiago de Compostela, uns dos máis antigos entre nós e dos máis importantes do circuíto non profesional para discentes novos.

Baixo o título xeral A danza dos xacentes o libro colectivo reúne poemas e relatos dunha ducia de mozas e mozos de Ensino Medio, seis por cada categoría, amosando a vitalidade e bo estado da escrita entre as promocións máis novas, o que asegura o recambio xeracional para as nosas letras.

Antón Blanco Casás, primeiro premio na modalidade de Poesía, trae a memoria do Berlín máis cruel, o teutón de ollos esmagados e cranio fendido polas balas, un pesadelo pérfido enlatado en versos de gume cortante. Paula A. Rey Baliña, segundo premio de Poesía, enluva a poética amatoria, o beizo e a pel que todo o envolven e alentan nun dicir helénico, velaíño. Kai L. Baltrusch Montero, terceiro premio de Poesía, venta as epifanías do cotián, traduce as instantáneas efémeras, toda esa cidade baleira na multitude, o tempo incendiando ao seu paso.

Acompáñanos como accésits poéticos Alexandre Fernández Peón (verso lisboeta, matemática imposible, trallazo da lembranza), María Vilas Pazos (telúrica, indómita, diédrica) e Santiago Alonso Pérez (cidade gris, sol desertor de soños fusilados).

Da súa parte, Ana M. Añel Prieto, primeiro premio de Narración, propón a través de “O segredo” un relato tremendista, de vinganzas e amores dolorosos con dicción monologada. Alba S. Naseiro Lamas, segundo premio de Narración con “Literatura”, metarrelata, ironiza e abisma para repensar o sentido da escrita. Sara Vázquez Mera, terceiro premio de Narración, asina “Xantofila”, historia de maltrato familiar, estigmas que a filla protagonista ve supurar, dor ante o incomprensible.

Completan o sexteto da prosa os accésits “Xadrez” de Icía Rodríguez Arias (coctelizado de influencias, citas e homenaxes mil), “Ninguén vive para sempre pero iso non é motivo para renderse” de Pablo Fernández Álvarez (blues do autobús, balada solitaria de ómnibus) e “Memorias dun morto” de Marina Ruíz Puy (narración dende Thánatos, o Alén cruzando a fronteira de volta, a guerra como escenario).

Aplauso pecho merece o labor do Colexio Manuel Peleteiro na organización dos Premios Literarios Minerva, que, coa publicación deste A danza dos xacentes, alcanza as corenta e dúas edicións, confirmándose como un impagable viveiro para a escrita xuvenil galega, que ten xa a súa vindeira convocatoria en marcha.

Noticia dos Premios Minerva 2013

Un ano máis, o Colexio M. Peleteiro de Santiago de Compostela deu a coñecer os relatos e poemas premiados no prestixioso e vedraio Certame Literario Minerva, o máis antigo dos que se convocan en Galicia, pois os seus inicios remóntanse a 1963. [Se clicas aquí poderás descargar un vídeo do evento]

A merecida fama destes premios medrou lustro tras lustro tanto da man dos que foron senlleiros mantedores e xurados destes modernos xogos florais coma dos numerosos escritor@s que foron distinguidos na súa mocidade co galardón.

Pois ben, na tarde do xoves 18, reuniuse nas instalacións do Colexio no barrio do Castiñeiriño un xurado composto por creador@s, docentes e crític@s que se repartiron para as modalidade de poesía e narrativa. Na primeira, figuraron o investigador e crítico Luís Alonso Girgado (en calidade de presidente), o poeta e etnógrafo Calros Solla, a estudosa e ensaísta Isabel Morán Cabanas, o narrador e xornalista Juan Tallón e mais o profesor Xabier Ferreiro Lozano, tod@s el@s como vogais. Da súa parte, para xulgar os textos narrativos compareceron o ensaísta e crítico Manuel Quintáns Suárez, a investigadora infantoxuvenil e crítica Montse Pena Presas, o filósofo e crítico Francisco Martínez Bouzas, a profesora Montserrat Fraguela Fraguela e un servidor, actuando como secretaria a tamén profesora Teresa González da Silva.

Logo dunha longa deliberación na que houbo tempo para apreciar debidamente a alta calidade dos textos presentados (111 en narrativa e 59 en poesía, dos cales foron escolmados para discusión na fase final 34 e 25, respectivamente), os xurados decidiron premiar os seguintes traballos:

Modalidade de narración

1º Premio a Elena López González, de 18 anos, alumna de 2º de BAC do IES Xograr Alfonso Gómez de Sarria, polo relato “Tigres azuis no mar de Andamán”.

2º Premio a Román Pérez Santalla, de 16 anos, alumno de 4º de ESO do Colexio Apóstol Santiago de Vigo, polo conto “Moscova 2093”.

3º Premio a Iria Iglesias Martínez, de 17 anos, alumna de 2º de BAC do IES Campo de San Alberto de Noia, pola narración titulada “Disturbia”.

1º Accésit a Alba Sofia Naseiro Lamas, de 17 anos, alumna de 1º de BAC do IES Basanta Silva de Vilalba, polo seu traballo “A Ratoeira”.

2º Accésit de novo a Elena López González, polo texto “A Tránsfuga”.

3º Accésit a Javier Rivas Rodríguez, de 16 anos, alumno de 1º de BAC do IES Carballo Calero de Ferrol, polo relato “Habitación 202”.

Modalidade de poesía

1º Premio a Brais Lamela Gómez, de 19 anos, alumno de Bacharelato Internacional en UWC ADRIATIC, pola súa triloxía “Cadernos vermellos”.

2º Premio a Afonso Francisco Traficante Fernández, de 17 anos, que cursa 2º de BAC no IES Antón Fraguas de Santiago, polo poemario “Paxaros de altos voos”.

3º Premio á xa amentada Elena López González, polo tríptico “Tres sombras”.

1º Accésit a Ignacio Delgado Ferreiro, de 17 anos, alumno de 2º de BAC do Colexio Compañía de María da Coruña, pola obra “Entartete Kunst”.

2º Accésit a Marcela Porto Mato, de 16 anos, estudante de 4º de ESO do Colexio Manuel Peleteiro de Santiago, pola triloxía “Ti, a Termomix e a Literatura”.

Tod@s @s gañador@, alén das correspondentes dotacións económicas, serán galardoad@s cun diploma acreditativo e mais unha medalla de prata do certame durante a entrega de premios que terá lugar o vindeiro xoves día 2 de maio, ás 17:10h., no Salón de Actos do Colexio Peleteiro, nunha sesión solemne na que pronunciará unha conferencia maxistral o dramaturgo, director e actor Manuel Lourenzo e que amenizarán os premiados coa lectura dun fragmento das súas creacións, adianto do que será publicado en breve nun volume coeditado polo centro e mais a Editorial Galaxia.

Novísim@s da literatura galega

Un ano máis o Colexio Manuel Peleteiro de Santiago de Compostela en colaboración coa Editorial Galaxia pon na rúa os textos premiados nos prestixiosos Premios Minerva, o máis antigo certame literario galego e, tamén si, un dos máis importantes para discentes preadultos.

Atendendo ás modalidades a concurso ―a saber: trípticos poéticos e relatos breves―, preto dunha ducia de novos valores ven publicados neste volume os seus primeiros (ou algúns dos seus primeiros) textos literarios en recoñecemento á súa distinción como gañadores ou accésit destes galardóns na convocatoria do 2012, segundo a concesión que fixo un xurado no que se contaron poetas, narrador@s e profesor@s como Luís Alonso Girgado, Manuela Palacios, Carlos Negro, Emilio Xosé Insua, Manuel Fonte López, Manuel Quintáns, Raquel Blanco Prol, Rosa Aneiros, Milagros Celeiro Arias, Teresa González da Silva e quen asina.

Así, a antoloxía deste ano, que leva por título Elexía para un rapaz louro, reproduce os versos homónimos de Ismael Ramos Castelo, unha escrita onde as simboloxías especulares e os procesos bélicos constitúen o escenario propicio para a reflexión intimista. Tamén comparecen os poemas de Alba Souto Rodríguez en “Lucy in the Sky with Diamonds”, lírica amatoria de imaxes sensuais ás que por veces asaltan gumes inesperados e entregas devecidas. Igualmente cruzan estas páxinas as estrofas vagamente surreais e caligráficas de María Luísa Iglesias Taboada en “Paraugas”, que en ocasións se tinguen de prosa poética e recendos mártires. Acompañan este tríade de premios os accésits de José Antonio Parada Barcia con “Eterna monotonía”, amor entregue e salvífico entre a gris monotonía; Marcela Porto Mato con “No intre agre do café”, poesía pentagramada na que a harmonía dos sintagmas xoga coa fusión e a creación verbal, os paralelismos expresivos e as rozadelas de suxestiva erótica; e, finalmente, Helena Salgueiro Golán e o seu “Para isto serven os contos”, a constatación da falsidade do mundo perfecto dos relatos de princesas nunha estética arrebatada, rabuñadora e decidida na que, malia a punxente denuncia, aboia de fondo a supervivencia do amor.

Da súa parte, o volume compila tamén cinco relatos de temática e estetica ben diversa: o amentado Ismael Ramos Castelo mergúllanos nunha historia viaxeira de amores femininos e amizades na fronteira co seu “Beirarrúa sueca”; María Elena López González acode á simboloxía e as historias ocultadas do pasado en “Oribio”; Laura Cordeiro Sobrino xoga coa imaxinación carceraria do seu protagonista para tracexar a montaña rusa de subtramas de “Viaxes imaxinarias”;  outra volta María Elena López González fai dialogar poesía e narración nun conto de pegada fantástica como “Os centauros de Whitman” e Elena Vázquez Sarandeses recorre novamente aos amores nórdicos e o fascinio sensorialista no relato “Aurora Borealis”.

Fiquen, por favor, co nome destas escritoras e escritores noveis. Teño a sospeita fundada de que dalgúns deles seguiremos oíndo falar cada vez con máis frecuencia. É a forza da seiva nova, que vén empurrando con pulo para asegurar un futuro brillante ás letras de noso.

Literatura novel

De paxaros e outros minerais é o título co que se publican os poemas e relatos gañadores do XXXVIII Premios Literarios Minerva, concedidos o pasado mes de maio e convocados polo prestixioso Colexio Manuel Peleteiro de Santiago de Compostela.

Cómpre chamar a atención, máis unha vez, sobre a importancia dun certame coma este, dos máis antigos de Galicia (leva celebrándose dende 1963) e, sobre todo, canteira inesgotable de novas promocións literarias, pois nestas últimas décadas foron sendo premiados nos Minerva moitos nomes hoxe ben referenciados no noso panorama editorial: Xosé Antón Neira Cruz, Olga Novo,  María Reimóndez, Samuel Solleiro, Roque Cameselle, Berta Dávila, Lucía Novas, Eva Moreda, Lucía Aldao… e, ben antes deles, Lois Diéguez, Xesús Rábade Paredes, Darío Xohán Cabana, Anxo Rei Ballesteros, Suso de Toro, Xavier Queipo…

Nesta ocasión, o Minerva distinguiu o verso cultista e surreal de Jesús Castro Yáñez nos textos que dan nome ao volume; as composicións coloquialistas e irónicas de José I. Ramos Castelo na súa “Oda á Cafeína” (quen tamén foi premiado na modalidade de narrativa polo intimista e delicado “O factor humano ou a vida privada dos pronomes”); os poemas metaliterarios de Daniel Martínez Mariño en “Lingua franca” (tamén presente no apartado de narrativa cunha homenaxe kafkiana ben humorada, descritivamente titulada “Transformación”); as poesías do eu asediado e anticursi de Jéssica Amado Dosil en “Tritetricismos de corpo morto”; a escrita pronominalizada e antisistémica de Alfonso F. Traficante Fernández en “Grotesque” ou a musa urbana, paralelística e francófona de Sabela Rodríguez Lorenzo.

Mais tamén se recollen aquí relatos de interese certo como “Talento por encargo”, de Brais Lamela Gómez, sarcástica historia sobre o mundo dos falsarios promotores artísticos; como as “Crónicas do cotián”, de Marta González González, debuxo dun mundo violento cheo de psiques atormentadas; como, en fin, a imposible viaxe de retorno ao cor da infancia que latexa en “Viaxe ao corazón”, de Óscar Rivero Salgado.

Os interesados en saber de nomes que, con certeza, poderán dar que ler entre nós nos próximos anos farían ben en facerse con este De paxaros e outros minerais, editado e distribuído pola Editorial Galaxia, que suma así ao seu catálogo as voces primeiras destes prometedores autores noveis.